# Ijtimoiy rolik Yo‘qotilgan vaqt.
# Ijtimoiy rolik
Yo‘qotilgan vaqt.
Inson umri lahzalardan iborat…
Bola — hayotning ovozi, hayajoni, qiziqishi. U dunyoni ko‘z bilan emas, qalb bilan his qilishi kerak edi. Ammo u qo‘liga birinchi bo‘lib quyoshni emas, ekranni oldi. Shu tariqa umrning birinchi betlari ko‘rmasdan o‘qila boshlaydi.
Ota esa hayotning o‘rtasida. Mas’uliyat, tirikchilik, oila yuki uning yelkasida. Ammo u ham charchoqni telefondan izlaydi. “Biroz dam olay” deb kirgan tarmoqlar uni soatlab asir qiladi. Shu vaqtda u bolasining bolaligini, otasining so‘nggi yillarini qo‘ldan chiqarib yuborayotganini sezmaydi.
Bobo esa xotiralar sohibidir. Uning aytar gaplari, o‘rgatadigan hayot darslari bor. Ammo bugun uning suhbatdoshi — telefon. U nabirasiga ertak aytib berish o‘rniga, jimgina ekranga tikilib o‘tiradi. Shu bilan birga, bir butun avlodning tajribasi, hikmati aytilmasdan qolib ketmoqda.
Eng og‘ir haqiqat shundaki, bu holat bizga begona emas. Bu — ko‘plab uylarning jim tasviri.
Inson ko‘pincha hayotni yashab bo‘lgandek sezadi, ammo aslida uni tomosha qilib o‘tkazib yuboradi. U lahzalarni ushlamaydi — ularni aylantirib o‘tadi.
Telefon bunda dushman emas. U faqat vosita. Ammo inson unga qaram bo‘lib qolsa, u vosita emas — vaqtning o‘ziga aylanadi. Va vaqt — qaytmaydi.
Ijtimoiy tarmoqlarning salbiy oqibati haqidagi ushbu video rolik Q.Muzrapov tomonidan tayyorlandi.
Qashqadaryo viloyati musiqali drama teatri matbuot xizmati