Teatrining bosh rejissyori Boynazarov Farxod Erkinovich
Qashqadaryo viloyati musiqali drama teatrining bosh rejissyori Boynazarov Farxod Erkinovich
Umumiy mehnat staji 23 yil.
Qashqadaryo viloyati musiqali drama teatrida 2008 yildan buyon oliy toifali aktyor lavozimida ishlab, 2022-yilning 1 fevralidan teatr Bosh rejissyori sifatida faoliyat ko‘rsatib kelmoqda.
Farhod Boynazarov fidoyi va malakali aktyor sifatida ko‘p yillardan beri teatr sohasida samarali mehnat qilib, teatr jamoatchiligi orasida teatr san’atini yuksaltirishda o‘zining munosib hissasini qo‘shib kelmoqda.
Farhod Boynazarov ijodiy faoliyati davomida teatrda sahnalashtirilgan spektakllarda ko‘plab bosh qahramon obrazlarini yaratish bilan bir qatorda oddiy insonlar obrazlarini ham maromiga yetkazib ijro etgan.
Aktyorning 2008-2020 yillarda teatr sahnasida qo‘yilgan ko‘plab spektakllardagi obrazlari muxlislar va mutaxassislar e’tirofiga sazovor bo‘lgan.
Jumladan, “Dadavoy”da Chol, “Kachal polvon”da Abu Tavoze, “Nuh kemasi”da Yofas, “Imkon”da Rustamali, “Xazina”da Esonboy, “Turmush hangomalari”da Jamshid, “Changak”da Samandar, “Layli va Majnun”da Laylining otasi, “To‘ylar muborak”da Mo‘minjon Qobilov, “Bobomning orzusi”da Abdusalom, “Yurt qadri”da Sattor, “Zo‘raki tabib”da Latifjon, “Bexato otilgan o‘q”da Sug‘urta agentligi vakili, “Qirol Lir”da Edmond, A.Avloniyning “Advokatlik osonmu..?” komediyasida Advokat, “Oq kema”da Mo‘min chol va Savdogar, “To‘y”da Domla obrazlarida bir-biridan betakror rollarni ijro etgan.
Farhod Boynazarov teatr sahnasidagi ijod bilan cheklanib qolmay, “O‘zbekfilm” va “SevimliTV” kanali ijodkorlari tomonidan suratga olingan bir qator filmlarda ham turli obrazlarni yaratgan. Jumladan, “Tuzoq” filmida Jurnalist, “Cho‘lpon” hujjatli filmida Cho‘lponning otasi Sulaymon, “Abdulla Qodiriy” hujjatli filmida Domla, MXX buyurtmasiga asosan suratga olingan maxsus videoroliklar ketma-ketligida soha xodimlari talqinida yaratgan obrazlari bunga yaqqol misoldir.
F.Boynazarov ijodiy faoliyati davomida mahoratli rejissyorlar mahorat-maktablarida, rejissyorlik laboratoriyalarida professional rejissyorlik sir-asrorlaridan saboq olib, rejissyorlik mahoratini ham namoyon etib kelmoqda. Viloyatda bo‘lib o‘tgan “Taqdimot-2008”da “Yilning eng sevimli aktyori” nominatsiyasi, 2010 yilda yosh rejissyorlarning
“Debyut-2010” III Respublika ko‘rik festivalida o‘zi sahnalashtirgan “Qo‘ng‘iroqli aldoqchi” spektakli bilan ishtirok etib, eng oliy o‘rin –
Gran priga sazovor bo‘ldi, 2011 yil “Seni kuylaymiz, zamondosh!” I respublika teatrlari ko‘rik-festivalida ham Nafas Shodmonov asari asosida sahnalashtirilgan “Najot darvozasi” spektakli bilan ishtirok etib rag‘batlantiruvchi sovrin, 2012 yil “Mustahkam oila yili”ga bag‘ishlab o‘tkazilgan “Iste’dodlar istiqboli” deb nomlangan viloyat ko‘rik tanlovida faol ishtirok etib, “Sahna suxandonligi” bo‘yicha birinchi o‘rin,
“E’tibor-2014” taqdimot marosimida “Yilning eng yaxshi rejissyori” nominatsiyalarini qo‘lga kiritdi.
Farhod Boynazarov rejissyor sifatida teatrda Anvar Obidjonning “Qo‘ng‘iroqli aldoqchi” (ertak), Nafas Shodmonovning “Najot darvozasi” (drama), “Oydin Davron” (musiqali drama), Alisher Navoiyning “Layli va Majnun” (musiqali drama), Jumaniyoz Jabborovning “To‘ydan oldin tomosha” (musiqali komediya), Rixsivoy Muxammadjonovning “Ko‘ngil ishq istaydi” (“Aldagani ayol yaxshi”) (musiqali komediya) asarlarini sahnalashtirgan.
Farhod Boynazarov rejissyor sifatida ham nafaqat teatrda, balki yosh avlod vakillari bilan faol aloqada bo‘lib, oliy ta’lim muassasalarida spektakllar sahnalashtirib, ular bilan hamkorlikda turli ko‘rik-tanlovlarda ishtirok etib kelmoqda. Jumladan, Qarshi Davlat Universitetining “Ziyo” talabalar teatr-studiyasi bilan Nafas Shodmonovning “Shiroq” spektaklini sahnalashtirgan va Respublika oliy ta’lim muassasalari o‘rtasida oliy o‘ringa munosib deb topildi. 2017 yilda mazkur oliy ta’lim muassasalari bilan Abdulla Qahhor hikoyalari asosida sahnalashtirilgan (N. Shodmonov inssenirovkasi) “Ko‘zalar” spektakli, Nafas Shodmonov asari asosida “Nodira”, “Naxshab afsonasi” asarlarini sahnalashtirib, asar poytaxtda o‘tkazilgan talaba yoshlar haftaligida ishtirok etib, Oliy o‘ringa sazovor deb topilgan hamda “Eng yaxshi sahna asari”, “Eng yaxshi rejissura” nominatsiyalarini qo‘lga kiritgan.
Farhod Boynazarovning teatrdagi va viloyat ommaviy-madaniy bayramlardagi faol ishtiroklari inobatga olinib, “O‘zbekiston Respublikasi Mustaqilligiga 20 yil”, “O‘zbekiston Respublikasi Konstitutsiyasining 30 yilligi” esdalik nishonlari bilan taqdirlangan.
Viloyat miqyosida muntazam o‘tkaziladigan “Mustaqillik”, “Navro‘z”, “8 mart xalqaro xotin-qizlar bayrami”, “14 yanvar Vatan himoyachilari kuni” va boshqa ommaviy-madaniy bayram tadbirlariga sahnalashtiruvchi rejissyor sifatida o‘zining munosib hissasini qo‘shib kelmoqda.
- Boynazarovning rejissyorlik mahorati respublika davlat teatrlari tomonidan ham yuksak baholanib, sahnalashtiruvchi rejissyor sifatida Jizzax viloyati musiqali drama teatrida Sulton Raev qalamiga mansub “Toj” spektaklini, Kattaqo‘rg‘on shahar drama teatrida S. Sirojiddinov asariga davlat buyurtmasi asosida “Davr o‘g‘loni” spektakllarini muvaffaqiyatli sahnalashtirib, soha mutaxassislari va tomoshabinlar e’tirofiga sazovor bo‘ldi. Jumladan, S. Raevning “Toj” spektakli 2022 yilning iyun oyida Farg‘ona viloyatining Qo‘qon shahrida o‘tkazilgan “Qo‘qon xonligining Turkiy xalqlar davlatchiligi shakllanishi va madaniy merosida tutgan o‘rni” mavzusidagi Xalqaro ilmiy konferensiyasi doirasida ilq taqdimoti namoyish etilib, TURKSOY Xalqaro Tashkilotining maxsus nishoni bilan taqdirlandi. Shuningdek, 2022 yilning oktyabr oyida Qozog‘iston Respublikasining Astana shahrida o‘tkazilgan TURKSOY Turkiy madaniyat Xalqaro tashkilotining “TEATRALL” II Xalqaro teatr festivali doirasida “Toj” spektakli “Eng yaxshi rejissyorlik ishi” sifatida e’tirof etilib, F. Boynazarov TURKSOY Xalqaro tashkilotining “Chingiz Aytmatov” nomidagi Xalqaro mukofoti hamda festivalning maxsus sovrini – Qozog‘iston xalq qahramoni, Qozog‘iston xalq artisti Azerbayjan Mambetov nomidagi ko‘krak-nishoni sohibi bo‘ldi.
2023 yilda Nafas Shodmonovning “Shiroq” asarini muvaffaqiyatli sahnalashtirganidan so‘ng, Sirdaryo viloyati musiqali drama teatriga taklif etildi hamda ushbu teatrda Yevripidning “Medeya” asarini sahnalashtirdi. Mazkur psixologik fojea spektakli mutaxassislar tomonidan mukammal rejissyorlik ishi sifatida baholanib, tomoshabinlar tomonidan yuksak e’tirof va olqishlar bilan qarshi olindi.
2024 yilda davlat buyurtmasiga asosan O‘zbekiston qahramoni, muallimlik faoliyati bilan bir qancha yutuqlarga erishib, yuzlab shogirdlarni jamiyatga foydali kadr sifatida tarbiyalagan, hayotlik chog‘idayoq zamonamiz qahramonlaridan biriga aylanib ulgurgan ustoz-muallim haqida haikoya qiluvchi, Sh. Xudoynazarova asari asosida “Muhabbat” spektaklini muvaffaqiyatli sahnalashtirdi. Rejissyorning yangicha yondashuvi bilan sahnalashtirilgan asar mutaxassislar hamda tomoshabinlar tomonidan yuksak e’tiroflar va olqishlar bilan qabul qilindi.
2025 yilning birinchi choragida Kattaqo‘rg‘on shahar drama teatrida F. Toshev qalamiga mansub “Millat filoyisi” spektaklini sahnalashtirdi. Mazkur asarda 20 asr boshidagi uyg‘onish davrining qahramonlaridan biri, o‘sha zamonning huquq va tartibot organlari rivojlanishiga katta hissa qo‘shgan, jadidlarni himoya qilish yo‘lida o‘z jonini garovga qo‘yib bo‘lsa ham, O‘zbekistonning ma’rifati va haq-huquqi uchun kurashgan qatag‘on qurboni, Kattaqo‘rg‘onlik prokuror Badriddin Sharipov haqida hikoya qilinadi. Spektakl Samarqand viloyati prokuraturasi buyurtmasiga asosan sahnalashtirilib, yangicha yondashuv, o‘zgacha talqin va mavzuni yoritishdagi muvaffaqiyatli natijalari uchun F. Boynazarov O‘zbekiston Respublikasi Prokuraturasining Tashakkurnomasi bilan taqdirlandi.
- Boynazarov istiqlol tufayli tiklangan milliy qadriyatlarimiz mazmun-mohiyati va ahamiyatini yoshlar o‘rtasida keng targ‘ib etishga o‘z hissasini qo‘shib, ta’lim muassasalarida o‘tkaziladigan davra suhbatlari va uchrashuvlarda faol ishtirok etadi.
Farhod Boynazarov teatrda yaratayotgan obrazlarida, sahnalashtirayotgan asarlarida vatanga muhabbat, yurtga sadoqat va inson qadr-qimmati borasidagi g‘oyalar asosida tomoshabinlarini tarbiyalashda o‘z hissasini qo‘shib, samarali ijod qilib kelmoqda.
Mahoratli va fidoyi aktyor, iste’dodli tashkilotchi, iqtidorli rejissyor, kamtar va samimiy inson sifatida hurmat qozongan mehnatkash inson.
Tel: 91-957-78-87