oliy toifali vokal artisti Rustamov Primkul Jabborovich

Qashqadaryo viloyati musiqali drama teatri oliy toifali vokal artisti

Rustamov Primkul Jabborovich

Mehnat staji 50 yil. Mazkur vazifada 1989 yildan ishlamoqda.

P.Rustamov 44 yillik ijodiy faoliyati davomida teatr sahnasida 30 dan ziyod rang-barang, katta-kichik obrazlar yaratib, mutaxassislar e’tiboriga va tomoshabinlar olqishiga sazovor bo‘ldi.

Jumladan, “Abulfayzxon”da Ulamo, “Amir Temur”da Qalandar, “Yangi ariq”da Sersalom, “Qari qizning baxti”da Qobil, “Sohibqiron”da Mir Said Baraka, “Bog‘bon qiz”da Avaz, “Shum bola”da Mulla, “Layli va Majnun”da Majnun, “Hisobini bilganlar”da Jarchi kabi ko‘plab spektakllarda betakror rollarni ijro etgan.

“Ruhlar isyoni” dostoni asosida sahnalashtirilgan spektaklda ham P.Rustamov Maslahatchi obrazini yaratish bilan birga ommaviy sahnalarda ishtirok etib, o‘z iste’dodini yangi qirralarini namoyon etdi.

P.Rustamov 2000 yilda Belgiyaning Kortrik shahrida o‘tkazilgan xalqaro folklor festivalida qatnashib, chet ellik muxlis va mutaxassislarga o‘zbek san’atini namoyon etib, yuksak olqish va e’tiroflarga sazovor bo‘ldi.

P.Rustamov teatrda rollar ijro etish bilan birga, o‘zining shirali va yoqimli ovozi bilan o‘zbek mumtoz va lirik qo‘shiqlarining mohir ijrochisi sifatida xalqimiz orasida hurmatga sazovor bo‘ldi. U ustozi O‘zbekiston xalq hofizi O‘lmas Saidjonov izidan borib, “Qoshi yosinmu deyin”, “Ey sabo”, “Girya”, “Dugoh”, “Segoh”, “Feruz”, “Bayot-4”, “Ko‘cha bog‘i-2”, “Na qildim”, “Gulizorim”, “Kelib ketsun”, “Nasrulloyi”, “Nasri bayot” kabi ko‘plab mumtoz qo‘shiqlarni mahorat bilan ijro etadi. Uning “Ona yurtim”, “O‘zbeklar”, “Kelar yor”, “Tinchlik”, “Nima bo‘ldi…?” “Bir qarasam” kabi ona vatanni va mehr-muhabbatni madh etuvchi bir necha qo‘shiqlari Qashqadaryo viloyat radiosida muntazam ravishda efirga uzatib borilmoqda.

2017 yil O‘zbekiston Qahramoni, xalq shoiri A.Oripovning shoh asari asosida sahnalashtirilgan “Jannatga yo‘l” musiqali dramasida Ota obrazi bilan teatrshunos adiblar, mutaxassislar va tomoshabinlar e’tirofiga sazovor bo‘ldi.

U o‘zining rollari va ijro etgan qo‘shiqlari orqali kelajak avlod ongida vatanga muhabbat, yurtga sadoqat, milliy an’anaviy qadriyatlarga sodiqlik g‘oyalarini singdirish orqali mamlakatimiz yoshlarining ma’naviy muhitini shakllantirishda o‘zining salmoqli hissasini qo‘shib kelmoqda.

P.Rustamov respublika va viloyat miqyosidagi o‘tkazilgan Mustaqillik, Navro‘z umumxalq bayramlari va ommaviy-madaniy tadbirlarda faol ishtirok etib kelmoqda.